Ráðleggingar Landlæknis um vegan mataræði

Þann 28. september síðastliðinn komu út ráðleggingar um grænkerafæði fyrir konur á meðgöngu og með barn á brjósti og börn upp að sex ára aldri. Ráðleggingarnar voru unnar af embætti landlæknis, Þróunarmiðstöð íslenskrar heilsugæslu og Menntavísindasviði Háskóla Íslands. Þetta eru fyrstu opinberu ráðleggingarnar um grænkerafæði hér á landi og eiga þær sér tæplega tveggja ára langan aðdraganda. Þörfin fyrir ráðleggingarnar hefur farið sívaxandi en auk vegan fólks hafa ljósmæður í mæðra- og ungbarnavernd kallað eftir ráðleggingunum, þar sem algengara er orðið að þær sinni vegan barnshafandi konum.Í ráðleggingunum er m.a. hægt að fræðast um hvaða næringarefni eru sérstaklega mikilvæg á þessum tímabilum ævinnar. Ráðleggingarnar voru unnar í nánu samstarfi við Samtök grænkera á Íslandi og voru fulltrúar samtakanna í faghópnum þær Björk Gunnarsdóttir, Vigdís Fríða Þorvaldsdóttir, Hildur Ómarsdóttir og Eyrún Gísladóttir. Mikil ánægja ríkti með samstarfið og er það von okkar að því verði haldið áfram á næstu árum þar sem margt er enn ógert í málaflokknum.

Útgáfan markar tímamót fyrir vegan samfélagið á Íslandi, því með henni er hið opinbera raunverulega að mæta vegan fólki á Íslandi á þeirra forsendum og viðurkenna að vegan mataræði uppfylli næringarþarfir fólks að öllu leyti.

Ráðleggingarnar má finna hér: https://www.landlaeknir.is/um-embaettid/frettir/frett/item50318/Radleggingar-um-graenkerafaedi-gefnar-ut